Muhammad

Etimologiyasi

Muhammad ismi arab tilidan olingan boʻlib, “حمد” (hamd) – "maqtamoq", "maqtov" degan so‘zdan kelib chiqqan. Bu ism “maqtovli”, “doimo madh etilgan”, “olqishlangan” degan ma’nolarni anglatadi. Qur’oni Karimda bu ism to‘rt marta aniq shaklda (Muhammad surasining 2-oyatida, Oli Imron surasining 144-oyatida, Fath surasining 29-oyatida va Ahzob surasining 40-oyatida) va bir marta “Ahmad” shaklida (Sof surasining 6-oyatida) zikr qilingan. Muhammad ismining arabcha yozuvi – مُحَمَّدٌ.

Tarqalgan hududi

Muhammad ismi butun dunyoda eng keng tarqalgan erkak ismlaridan biridir. Ayniqsa musulmon aholisi ko‘p bo‘lgan mamlakatlarda: Indoneziya, Pokiston, Bangladesh, Hindiston, Turkiya, Eron, Misr, Saudiya Arabistoni va boshqa ko‘plab davlatlarda keng qo‘llaniladi.

Shuningdek, O‘rta Osiyodagi davlatlarda – O‘zbekiston, Qozog‘iston, Qirg‘iziston, Turkmaniston, Tojikiston va boshqa turkiy davlatlarda bu ism alohida hurmat bilan ishlatiladi. Bu hududlarda Muhammad ismi odatda boshqa ismlar bilan birgalikda qo‘llaniladi: Muhammadali, Muhammadamin, Muhammadyusuf kabi.

Yevropa mamlakatlarida, jumladan Buyuk Britaniya, Fransiya, Germaniya kabi joylarda ham bu ism o‘g‘il bolalarga eng ko‘p qo‘yiladigan ismlardan biri hisoblanadi.

Ismning e’tibori

Ushbu isming dunyoda juda katta e’tibor va hurmatga ega bo‘lishining asosiy sababi — Payg‘ambarimiz Muhammad (sollallohu alayhi vasallam) ismlari ekanligidir. Islom dinida bu zot eng ulug‘ inson sifatida tan olinadi va musulmonlar farzandlariga bu ismni berish orqali hurmat, baraka va duoni tilashadi.

Statistika

Buyuk Britaniya Milliy Statistika boshqarmasining 2023-yilgi hisobotiga ko‘ra, Muhammad ismi yangi tug‘ilgan o‘g‘il bolalar orasida eng ko‘p berilgan ism bo‘lgan. Shuningdek, Pokiston, Indoneziya va Misrda ham bu ism birinchi o‘rinda turadi.

Shakllari

Muhammadjon, Muhammed, Nurmuhammad, Nurmat, Holmuhammad, Holmat, Mammed, Mogomed, Mohammad, Muhamad, Mamad, Mamat, Mahmud, Ahmad